Estudo dunha alternativa a Avaliemos

Software que se emprega actualmente: Avaliemos

Na actualidade, a Universidade da Coruña (UDC) está a empregar, no web de enquisas do alumnado e do profesorado, un programa que se realizou ad-hoc e que se denomina Avaliemos. Este programa xurdiu pola necesidade de automatizar o proceso de avaliación docente da Universidade da Coruña a través de enquisas para o alumnado e o profesorado que se contestan integramente a través da rede.

A recollida dos datos faise a través dunha aplicación informática que se deseñou para o efecto; con todo, e nunha fase previa, formulouse un sistema de xeración de enquisas.

Descrición

Opina [opina] é unha aplicación web para a xestión de cuestionarios deseñada para que calquera usuario poida elaborar os seus e adaptalos ás súas necesidades, obter resultados destes e, posteriormente, procesalos. Está desenvolvida na linguaxe Java e a súa instalación require ter previamente instalados MySQL, J2SE e Apache Tomcat.

Historia do proxecto

Nos seus inicios, a aplicación Opina non tiña nome como tal e atopábase desenvolvida en PHP. Posteriormente xurdiu a posibilidade de evolucionala grazas a un investimento económico da Universidade de Sevilla e así se fixo. A Universidade de Sevilla colaborou co seu desenvolvemento e foi a primeira en instalar a aplicación agora coñecida como Opina. O seu obxectivo era realizar desde calquera acceso da Internet os seus propios cuestionarios, xestionar os usuarios (enquisados), realizar modificacións así como parametrizar e configurar todas as opcións de que consta.

Posteriormente, outras colaboracións (UCA, URV, UGT etc.) fixeron que o proxecto continuase a evolucionar.

No mes de setembro de 2007 decidiu liberarse o proxecto Opina 1.x, como informou Manuel Recena, membro e director técnico do proxecto, na seguinte ligazón do seu web: http://www.manuelrecena.com/blog/archives/91-Opina-1.x-se-libera-con-licencia-GNU-GPLv2.html.

Licenza

Opina 1.x é software libre e distribúese segundo os termos da versión 2 da Licenza Pública Xeral GNU.

Membros e colaboradores do proxecto

Os membros activos deste proxecto son os seguintes:

• Manuel J. Recena Soto, no grao de director técnico, desenvolvedor, responsábel de accesibilidade-usabilidade e de calidade (QA). - http://www.manuelrecena.com - recena [at] eii.us.es
• Paulo Tromp Maseda, no grao de deseñador e responsábel de accesibilidade-usabilidade. - http://www.inmersio.com

O proxecto presenta os colaboradores seguintes:

• Felix García Borrego, no grao de programador principal (inactivo). - borrego [at] gmail.com
• Alberto Molpereces como programador (inactivo). - http://www.linkingpaths.com/ - alberto.molpeceres [at] gmail.com
• Pedro José Lucas Doctor como programador. (Inactivo)

Quen emprega a aplicación

Algunhas institucións que están a empregar Opina son as seguintes:

• Universidade de Sevilla [US]
• Rama de Estudantes do IEEE da Universidade de Sevilla [IEEESB]
• Universidade de Cádiz [UCA]
• Universidade Rovira i Virgili [URV]
• Unión Xeral de Traballadores de Andalucía [UGTA]

Funcionalidades

• Creación de cuestionarios e enquisas de forma personalizada.
• Distintos tipos de cuestións: numéricas, elección múltipla, gradientes, matrices e abertas.
• Configuración de mensaxes de validación.
• Configuración da data de inicio e de fin para os cuestionarios e as enquisas.
• Número indefinido de cuestionarios por usuario enquisador.
• Número indefinido de cuestións por cuestionario.
• Posibilidade de crear grupos de cuestións con título e descrición.
• Posibilidade de paxinar os cuestionarios e as enquisas.
• Organización de cuestionarios e enquisas por cartafoles.
• Portapapeis para copiar e mover os cuestionarios e mais as enquisas.
• Xeración de informes globais e individuais.
• Exportación de resultados en formato CVS para ser importados desde Microsoft Excel, OpenOffice.org etc.
• Tres modos de acreditación e tres modos de rexistro con que definir os cuestionarios e mais as enquisas.
• Creación de grupos de usuarios.
• Asociación de usuarios a cuestionarios e enquisas.
• Envio dun convite por correo electrónico aos usuarios asociados a un cuestionario ou enquisa.
• Opina permite o emprego dun LDAP para a autenticación de usuarios.

Con respecto ao último punto, Manuel Recena, director do proxecto Opina, recomenda realizar unha carga de datos a partir dunha exportación dun LDAP e/ou BBDD. É dicir, para Opina, os alumnos son usuarios dos correspondentes cuestionarios que previamente o usuario enquisador deu de alta. Os profesores son usuarios con rol de enquisador e as materias con grupos de usuarios.

Deficiencias

• Nas preguntas do tipo gradiente, se se indicaren 4 opcións aparecen 5: 0,1,2,3,4, un feito, o de comezar en 0 en lugar de 1, que resulta ilóxico nesta situación.
• Nas preguntas do tipo gradiente non se pode configurar se se quere unha opción de non sabe/non contesta.
• A interface e mais as mensaxes non están internacionalizados.

Estes tres puntos figuran xa como melloras propostas polos membros, polos colaboradores e mais polos usuarios do proxecto para as versións seguintes.

Perspectivas de futuro

No web de Opina están a formular novas funcionalidades para engadirlle ao proxecto e solucionar certas deficiencias. Entre os diferentes puntos que están a barallar, cómpre subliñarmos os seguintes:

• A configuración das preguntas do tipo gradiente para que o enquisador determinar o valor mínimo e mais o valor máximo e para que o sistema amose, como valores, unha escala correspondente aos números enteiros maiores ou iguais que o valor mínimo e menores ou iguais que o valor máximo.
• Engadir a posibilidade de que o usuario que realizou un cuestionario poida imprimilo.
• Engadir un paxinador para os informes individuais de tal xeito que se poida navegar polos cuestionarios que realizaron os usuarios enquisados.
• Engadir un conxunto de cuestións por defecto (o tipo de data, o tipo de idade etc.)
• A configuración, nas preguntas de opción múltipla, se se quere que as opcións se amosen cun despregábel.
• A posibilidade de almacenar os resultados dun enquisado no momento (data e hora) en que se fixo e, talvez, o instante en que comezou a realizar o cuestionario.
• Engadir unha barra de progreso no asistente de cuestionarios, o formato [X de Y] ou unha porcentaxe para informar o usuario enquisado do número de páxinas que ten o cuestionario e da páxina en que se acha. Tamén barallan a indicación do número total de cuestións que contén o cuestionario. Ao o usuario definir un cuestionario, podería elixir cunha cela de verificación se quere que para ese cuestionario se amose a dita información.
• Amosar, no asistente de cuestionarios, que cuestións están configuradas como requiridas.
• Mellorar a escritura de instalación (/instalar,jsp) para que:
  1. pregunte os datos que teña que preguntar (usuario, contrasinal etc.)
  2. se execute automaticamente a primeira vez (se existir un ficheiro determinado ou non)
  3. a estética das páxinas sexa a da aplicación

No seu web, Manuel Recena indica na mesma nova en que se indica a liberación de Opina 1.x [5] que proximamente sairá a versión 2.0. de Opina.